न्ह्युगु नेपाः

सृष्टिया हे छगु उत्कृष्टम्ह प्राणी मनु,
बुद्धिमान् म्ह प्राणी

न्ह्याक्व हे न्ह्योने थ्यंसां
अझं व सिवें न्ह्योने  थ्यंकेमाःगु वैगु बानी
पलाः छिनाःसां
स्वाहाने गयासां
पःखाः गयासां
तिं तिं न्हुयासां
तं तं गयाःसां
ब्वायेँ ब्वायेँ जुयासां
फःसा ब्वया ब्वयासां

दक्ल्ये न्ह्योने  थ्यंकीगु हे वईगु आज्जू
न्ह्याथ्थे यानासां व न्ह्योने  थ्यंकेत स्वया हे च्वनी
ख जि नं छम्ह मनु
न्ह्योने  थ्यंक वनेगु जिगु नं आज्जू
थ्व आज्जू तक्क थ्यंकेत
जि नं थःगु हे तालय् जुया
छपला निपला यायां पलाः छिनां
जि बुलुहुं वनाः च्वना
छन्हु छम्ह वया जित हेय्क वल
जित एशियाली मापदण्डय् थ्यंकाबी धका धाल
गाँस, वास व कपासया ब्यवस्था यानाबी धाल
जिं पत्यायाना
वं जित लुचुक्क बुया यंकल
जि लय्ताया
थःगु आज्जुइ याकनं थ्यनी भनं
तर तर जि अन मथ्यं
''छ जुइगु लं फोहरगुलीं मथ्यंगुका''
मेम्ह वया चाकुमाकु खँ धया हेय्क वल
''वा मेलम्चीया लः हया व सतक हे सिलाबी''
धया जित साः वल
रोटी, कपडा व मकानया ब्यवस्था यानाबी धका धाल
जिं वैगु खँ नं पत्या याना
अले वैगु पं लिना वना
वं नं जित बुया बुया यंकल
तरनं जि जिगु आज्जुइ तक्क थ्यंके मफु
हानं मेम्ह वल सिंगापुर दय्काबी धका
हानं मेम्ह वल जनता जनार्दन धाधां चाकरी यायां
हानं मेम्ह वल जिगु म्वाँसां म्वाँसां प्रशंसा यायां
छाना, नाना व खानाया ब्यवस्था यानाबी धका
हानं मेम्ह वल न्हुगु संबिधान, न्हुगु नेपाः दय्काबी धका
हानं मेम्ह... हानं मेम्ह.... हानं मेम्ह यायां
हेय्की पिंला ग्वाः ग्वाः हे दत
चाकु माकु खँ ल्हाईपींला ग्वाः ग्वाः हे दत
जि न्हृयामेस्यां हेय्कुसां पत्या या यां जुया:
इपिं लिसें हे प्यपुनां जुया
वं छकः वं छकः या यां जित बुया गनं गनं इम्सं यंकातुं च्वन
अहँ जि गननं मथ्यं
जि जिगु आज्जू पाखें तापाका च्वने माल
इम्सं जित जिगु आज्जूइ तक्क थ्यंकेगु कुतः हे मयाः खनी
जि न्ह्यों न्ह्यों हे वना च्वं थें ताःसां
जि न्ह्याब्लें ल्यूने हे जक लाना च्वन

तर आर्श्चर्य !!
अःखवतं जित बुया यंकिपीं धाःसा
जित हेय्क वैपिं धाःसा
जिगु चाकरी याईपिं धाःसा
पत्या हे मजुइकथं
न्ह्याब्लें न्ह्योने  न्ह्योने
अझं न्ह्योने
गन थ्यं थ्यं ........

तर अफसोच ! तर अफसोच !!
जि चाहिं न्ह्याब्लें ल्युने
जि जिगु आज्जू पाखें झं झं तापाना च्वना
जिगु आज्जू जि पाखें झं झं तापाना च्वन
केवल जितः त्वाथः जक दय्कल खनी उम्सं
थः न्ह्योने थ्यंक वनेगु स्वाहानेया त्वाथःचा
जि बिवश त्वाथःचा जुइत
स्वाहानेय् हे प्यपुना च्वनेत
न्ह्यामेस्यां हेय्कः वःसां
पत्या या यां ल्यू ल्यू जुइम्ह जि
थःत इम्सं थः थहां वनेगु त्वाथःचा जक दय्कुगु
ल्वाप्पा नकुगु
म्वाय् चिंकुगु
जिं गब्लें वाचाय्के मफु
जि न्ह्याब्लें इमिगु चाकुमाकु खँय् भुले जुया
इमिगु ल्यू ल्यू जुया च्वना
ख ख इपिं नं मनु त हे ख
इमिगु नं आज्जू दु न्ह्योने  थ्यंकः वनेगु
इपिं धाःसा न्ह्योने  थ्यना नं च्वंगु दु
न्ह्योने  थ्यंसां अझं न्ह्योने  थ्यंकेगु कुतः याना च्वंगु दु
अझ थौं कन्हेला इपिं अझं न्ह्योने  थ्यंके भनं
सनाः च्वंगु दु
ल्वानाः च्वंगु दु
घोरा घोर जुइक
दागादुगु हे यानाः
म्हुतु वाना वानाः
न्यनां न्यने हे मजिईक
तुती साला सालाः
व फुसा व व फुसा व
न्ह्योने  च्वँ वनेत
मेपिन्त ल्यूने लाके भनं
वं वैत बस्वाना च्वंगु दु
वं वैत बस्वाना च्वंगु दु
न्यनां न्य्ने मजिईक, स्वयां स्वय् मजिईक

थौं तिनी जिं थुइका
थौं तिनी जिं वाचाय्का
न्ह्यामेस्यां हेय्कुसां
चाकुमाकु खँय् पत्या याय् मज्यू खनी
मखुसा झी थःगु आज्जूइ तक्क थ्यंकेत तालाई मखु खनी
खयेतला झी दक्वं थःथःगु हे आज्जूइ
थ्यंकेत कुतः याना च्वना
साम, दाम, दण्ड, भेद दक्वं छ्यला
थःगु जक स्वार्थ स्वया उपिं जुल
जि धाःसा थःगु हे तालय्
दक्वंसीगु हित जूइकथं जुया
इपिं उमिगु आज्जूइ थ्यंसां ल्वाना च्वन
जि धाःसा थःगु आज्जूइ मथ्यना ख्वया च्वना
सुक्क सुक्क.......
आःला ह्वायेँ ह्वायेँ हे
थौं जित इम्सं वास्ता तकं मया
थौं जिगु ख्वसः इम्सँ ताःसां ताछु तक्कं मयाः
मा तक्क बिचाः म्वालकी कुचाः
आ हानं जिगु ख्वःसः ताय्का
मेम्ह उसीं सना हः थें ताः
आ वं नं चाकु माकु खँ ल्हा ल्हां
जित थः पाखे सालेत स्वै
वैगु चहःपह खँ खँ हे जिं तिफ्याय् धुन

आ चाहिं होश या !
आ चाहिं होश या !!
जिगु मनं जित न्वाना च्वंगु दु
जिगु मनं जित धया च्वंगु दु
 तः तः सःलं न्य्ना च्वंगु दु
''छु छंगु आज्जू व वैगु आज्जू छगु हे खःला........ ?''
''छाय्की इपिं धैपिं नेतात ख नेता चाकुमाकु खँ ल्हाईम्ह
छला छम्ह फगत साधारण नेपाःमी
करोडौं नागरीक मध्ये छम्ह
उमीगु आज्जू धैगु
प्रधानमन्त्रीया कुर्सी, पद प्रतिष्ठा व अकुत सम्पत्ति
राज्यय् हाली मुहाली यायेगु
छंगु आज्जूला केवल नय्गु, पुनेगु, व च्वनेगु
पित्यागु प्वा जाय्केया नितिं नय्गु
नाङ्गागुम्ह त्वपुइत पुनेगु,
अले त्यानुसा झासुलनेत च्वनेगु
थथेहेयाना हे थःगु परीश्रमं शान्त, समृद्धि व विकसीत नेपाः दय्कीगु
हलिमय् हे नेपाःया न्हाय् गर्व नक्सां धस्वाकेगु''
खः ! खः !! झीगु आज्जू धैगु हे
दक्वं नेपाःमीया न्ह्युगु ख्वा स्वय्गु हे ख
झी दक्वं मिलेजुया न्ह्युगु नेपाः दयेकिगु हे ख
न्ह्युगु नेपाः !
न्ह्युगु नेपाः !!
न्ह्युगु नेपाः !!!

खय्तला इम्सं न्हुगु नेपाः दयेकिगु धा धां सना जुल
दे ख्वःगु तकं वास्ता हे मयाःसे
थुखें उखें देयात घाः लाका
घाल्य् वासः हे मयासें
झी चाहिं केवल देयात लय्ताय्केत स्वया च्वना
नेपाःयात लय्ताय्केत स्वया च्वना
न्ह्युगु नेपाःया ख्वा स्वय्त आय्बुया च्वना
न्ह्युगु नेपाः स्वय्त.....
खबरदार ! खबरदार !! खबरदार !!!
ए नेता त !! खबरदार ! खबरदार !! खबरदार !!!
आ दे यात छिम्सँ ख्वय्के दैमखु
ख्वय्के दैमखु छिम्सँ नेपाःमांयात !!!
आवंली दे यात मख्वय्केगु खःसा जक छिम्सँ जिगु साथ फ्वं वा
दे यात न्हिईकेगु, लय्ताय्किगु खःसा जक झीगु साथ फ्वं वा
वा वा झि दक्वं छप्पं जुया मिले जुया
ल्हा नापं ल्हा ज्वना मां हनां
नेपाःमांयात लय्ताय्का न्ह्युगु नेपाः दय्के
वा न्ह्युगु नेपाः दय्के
मुसुहुं न्ह्युगु नेपाः
वा झि दक्वं छप्पं जुया
न्ह्युगु नेपाः दय्के
नेपाःमांयात लय्ताय्का
लय्ताया मुसुहुं न्ह्युगु नेपाः दय्के
मुसुहुं न्ह्युगु नेपाः
मुसुहुं न्ह्युगु नेपाः......
> -.-.-.-.-.-.-.-{२०६७ कार्तिक २८ये जूगु न्हापांगु लहना चिनाखँ कासाय् ल्यू (2nd) लाःगु चिनाखँ}